"Bu mərhələdə Vaşinqtonun təklif etdiyi sülh planının həyata keçirilməsi ləngiyib"

"ABŞ oktyabrın 27-də İsrail parlamentində keçirilməli olan seçkilərdən sonra Qəzza zolağında vəziyyətin sülh yolu ilə nizamlanması istiqamətində irəliləyiş gözləyir".

"Operativ Məlumat Mərkəzi-OMM" xəbər verir ki, bu sözləri ABŞ-nin BMT yanında daimi nümayəndəsi Mayk Uolts bildirib.

O qeyd edib ki, bu mərhələdə Vaşinqtonun təklif etdiyi sülh planının həyata keçirilməsi ləngiyib.

"Problemlər İsrail ilə radikal Fələstinin HƏMAS hərəkatı arasında sülh prosesi çərçivəsində müəyyən şərtlərin yerinə yetirilməsi ardıcıllığı ilə bağlı fikir ayrılıqlarından qaynaqlanır. Xüsusilə, söhbət HƏMAS birləşmələrinin tərksilah edilməsindən və İsrail ordusunun Qəzzadan çıxarılmasından gedir. ABŞ ümid edir ki, Knesetə seçkilərdən sonra vasitəçilərin iştirakı ilə hər iki tərəf bu ziddiyyətləri aradan qaldıra biləcək", - o qeyd edib.

Xatırladaq ki, yanvarın 22-də Davosda keçirilən Ümumdünya İqtisadi Forumu çərçivəsində 19 ölkənin nümayəndələri Qəzza zolağında vəziyyətin nizamlanması çərçivəsində yaradılmış Sülh Şurasının nizamnaməsini imzalayıblar. Vaşinqton digər dövlətlərin də təşkilata qoşulduğunu bəyan edib.