Bruklində yaşayış binasının tikinti sahəsinə çökməsi nəticəsində 8 nəfər ölüb

ABŞ-ın Nyu-York şəhərinin Bruklin rayonunda yaşayış binasının qonşuluqdakı tikinti sahəsinə çökməsi nəticəsində 8 nəfər ölüb, azı 17 nəfər yaralanıb. Xilasedicilər dağıntılar altında sağ qalanların olub-olmadığını araşdırır.

AnewZ-nin məlumatına görə, Nyu-York meri Zöhran Mamdani ölənlərin sayını çərşənbə günü, noyabrın 11-də, Flatbuş məhəlləsində baş verən çökmədən sonra təsdiqləyib.

Mamdani cümə axşamı bildirib ki, xəsarət alanlar arasında üç yanğınsöndürən də var. Nyu-York Yanğınsöndürmə İdarəsi isə daha əvvəl “Reuters” agentliyinə dörd nəfərin vəziyyətinin ağır olduğunu deyib.

Üçmərtəbəli bina çərşənbə günü saat 16:00 radələrində (Qrinviç vaxtı ilə 21:00) uçaraq qazıntı işlərinin aparıldığı bitişik tikinti sahəsinə düşüb. Rəsmilər çökmə zamanı 1930-cu illərdə inşa edilmiş binada neçə sakinin olduğunu, eləcə də tikinti sahəsində neçə işçinin çalışdığını bilmədiklərini bildiriblər.

Yanğınsöndürmə idarəsinin komissarı Lillian Bonsignore hadisədən zərər çəkənlər arasında yeddi uşağın olduğunu deyib. Onların ölənlər arasında olub-olmadığını isə dəqiqləşdirməyib.

Hakimiyyət orqanlarının çərşənbə axşamı axşam keçirdiyi mətbuat konfransında verdiyi məlumata görə, yaxınlıqda olan yanğınsöndürənlər qrupu çökmədən bir dəqiqə sonra hadisə yerinə çataraq dağıntılar altından insanları çıxarmağa başlayıb. “WABC-TV” telekanalı çöküşdən iki-iki saat yarım sonra, o cümlədən hamilə qadın olmaqla, azı dörd nəfərin xilas edildiyini xəbər verib.

Yanğınsöndürmə idarəsinin məlumatına əsasən, hadisə yerinə təxminən 250 yanğınsöndürən və təcili tibbi yardım əməkdaşı cəlb olunub.

Axtarış qrupları axtarış itlərinin köməyi ilə dağıntıları nəzərdən keçirib, mümkün sağ qalanları tapmaq üçün qalıqları vedrə-vedrə kənarlaşdırıb. Yerli televiziya görüntülərində işlərin davam etdiyi əks olunub.

Yanğınsöndürmə idarəsinin rəisi Con Esposito ərazinin hərtərəfli yoxlanmasının bir neçə gün çəkə biləcəyini bildirib. Onun sözlərinə görə, xilasedicilərə mümkün zərərçəkənləri tapmaq məqsədilə bütün sahəni axtarmaq üçün bu müddət lazım olacaq.

“Ümumilikdə neçə nəfərin itkin düşdüyünü bilmirik”, – Esposito deyib.

Mamdani bildirib ki, çökmənin səbəbini müəyyənləşdirmək üçün şəhərin Tikinti Departamenti və hüquq-mühafizə orqanları araşdırmaya başlayıb.