Bəqai Trampın təhdidlərinə Qurani-Kərimdən sitat gətirərək cavab verdi

İran Xarici İşlər Nazirliyinin sözçüsü İsmayıl Bəqai Donald Trampın iranlılara qarşı təhdidlərini pisləyib.

“Operativ Məlumat Mərkəzi-OMM”xəbər verir ki, bu barədə "Tasnim" məlumat yayıb.

Məlumatda bildirilib ki, Trampın İrana qarşı aqressiv ritorikasına cavab olaraq Bəqai bazar günü gecəsi X hesabında paylaşım edərək İranın mövqeyini ifadə edib.

Qeyd olunub ki, sözçü Qurani-Kərimdən ayələrə istinad edərək xarici təhdidlərə qarşı ilahi dəstəyə olan inamı vurğulayıb və qarşıdurmanı iman və ilahi ədalət kontekstində təqdim edib.

Bəqai paylaşımında bildirib:

“Şeytan onları məğlub etmiş və Allahın zikrini onlara unutdurmuşdur. Bunlar Şeytanın dəstəsidir. Şübhəsiz ki, Şeytanın dəstəsi ziyana uğrayanlardır. (19)

Həqiqətən, Allaha və Onun Elçisinə qarşı çıxanlar ən alçaq insanlardan olacaqlar. (20) Allah buyurmuşdur: “Mən və Mənim Elçim mütləq qalib gələcəyik”. Həqiqətən, Allah Qüvvətlidir, Qüdrətlidir. (21)”

Sözçü əlavə edib ki, bu ayələr Əl-Mücadilə surəsindəndir.