Bakının Nərimanov rayonunda yerləşən ticarət obyektində yanğın hadisəsi qeydə alınıb.
Fövqəladə Hallar Nazirliyinin "Operativ Məlumat Mərkəzi-OMM"-ə verdiyi məlumata görə, yanğın Əhməd Rəcəbli küçəsində yerləşən obyektdə baş verib.
Korrupsiyaya qarşı Mübarizə Baş İdarəsində 2025-ci ildə yüzlərlə material araşdırılıb
Məlumata əsasən, hadisə barədə məlumat daxil olduqdan dərhal sonra FHN-in Dövlət Yanğından Mühafizə və Xüsusi Riskli Xilasetmə xidmətlərinin qüvvələri əraziyə cəlb olunub.
Hadisə yerində aparılan ilkin qiymətləndirmə zamanı ümumi sahəsi 560 kvadratmetr olan, istilik sistemlərinin satışı ilə məşğul olan dördmərtəbəli obyektin mansard hissəsində yanğın baş verdiyi müəyyən edilib. Havanın küləkli olması yanğının yayılma riskini artırsa da, operativ tədbirlər bunun qarşısını almağa imkan verib.
Yanğınsöndürənlərin çevik və təxirəsalınmaz müdaxiləsi nəticəsində alovun digər mərtəbələrə və yaxınlıqdakı obyektlərə keçməsinə yol verilmədən yanğın qısa müddətdə söndürülüb.
Yanğın nəticəsində mansard mərtəbənin yanar konstruksiyaları və rəflərdə saxlanılan santexnika malları təxminən 80 kvadratmetr sahədə yanıb. Obyektin əsas hissəsi və bitişik tikililər yanğından qorunub.
Hadisə zamanı xəsarət alan olmayıb.
