Qida Təhlükəsizliyi Agentliyi (AQTA) tərəfindən Bakı şəhərində fəaliyyət göstərən fitness zallarında qanunsuz idman qidalarının satışına qarşı reyd keçirilib.
“Operativ Məlumat Mərkəzi-OMM”-in məlumatına görə, monitorinqlər nəticəsində qida təhlükəsizliyi qeydiyyatı olmayan 6 müəssisədə təhlükəli idman əlavələrinin satıldığı müəyyən edilib.
Bakıdakı hansı fitness zallarında qanunsuz idman qidaları aşkarlandı?
Yoxlamalar zamanı xüsusilə iki idman zalında ciddi qanun pozuntuları qeydə alınıb. Həmin obyektlərdə idman qidalarının Azərbaycan dilində etiket məlumatları və idxal sağlamlıq aktları olmadan qanunsuz şəkildə satışa çıxarıldığı aşkarlanıb:
- Suraxanı rayonu (İ.Musayev küçəsi, massiv Q3): Fiziki şəxs Mehdiyev Vüsal Elxan oğluna məxsus "EG Fitness" idman zalı.
- Nərimanov rayonu (Azadlıq pr., ev 145): Fiziki şəxs Aslanlı Fuad Yavər oğluna məxsus "Tempo Fitness" idman zalı.
Müsadirə edilən və mənşəyi şübhə doğuran qanunsuz məhsullar (əmtəə nişanları) bunlardır:
- "İnstant Oats (ironmax)", "Amino Professional", "Ultra Strong (ironmax)"
- "Omega 3 Professional", "Creatine Powder (ironmax)"
- "Pure Whey Isolate 95", "CLA Green Tea plus L-Carnitine"
- "L-Carnitine Extreme Shot", "Extreme Speed Shot"
- "Arginin Ornitin", "Krom Aktiv", "Pump Express 2.0 Concentrate"
Qanunsuz fəaliyyət göstərən sahibkarları nə gözləyir?
Aşkarlanan nöqsanlarla bağlı qaydaları pozan sahibkarlar barəsində inzibati protokol tərtib edilib. Şübhəli məhsullardan xüsusi nümunələr götürülərək, təhlükəsizlik tələblərinin yoxlanılması məqsədilə laborator müayinələrə cəlb olunub.
Hazırda həmin idman qidalarının toxunulmazlığı tam təmin edilərək, dərhal satışdan kənarlaşdırılıb.
Agentlikdən idmançılara və vətəndaşlara vacib xəbərdarlıq
Qida Təhlükəsizliyi Agentliyi vətəndaşlara müraciət edərək, qida təhlükəsizliyi qeydiyyatından keçməyən və müvafiq icazə sənədləri ilə müşayiət edilməyən bioloji aktiv qida məhsullarını, o cümlədən idman qidalarını almaqdan qəti şəkildə çəkinməyi tövsiyə edir.
