OMM Redaksiyası
“Böyük Qayıdış” proqramı çərçivəsində işğaldan azad olunmuş ərazilərə səfərlər genişlənir. Azərbaycan Yerüstü Nəqliyyat Agentliyi (AYNA) tərəfindən vətəndaşların rahatlığını təmin etmək məqsədilə yeni Bakı-Laçın müntəzəm avtobus reysi təşkil edilir.
Bu barədə Agentlikdən "Operativ Məlumat Mərkəzi-OMM"-ə məlumat verilib.
Bakı-Laçın avtobus reysinin qrafiki və gediş haqqı
25 fevral tarixindən fəaliyyətə başlayacaq avtobuslar Laçın-Həkəri-Zəngilan yolu ilə hərəkət edəcək. Reyslər aşağıdakı qrafiklə həyata keçiriləcək:
Avtobuslar Bakı Beynəlxalq Avtovağzal Kompleksindən Laçına hər gün saat 08:00-da, əks istiqamətdə isə 16:00-da yola düşəcək. Bakı-Laçın reysi üzrə gediş haqqı 16,10 AZN məbləğində müəyyən edilib.
Marşrut üzrə aralıq məntəqəsi Zəngilan rayonunun Ağalı kəndi təyin olunub. Bu istiqamətdə aralıq məntəqə üzrə gediş haqqı isə 13,80 AZN təşkil edir.
Marşrut dəyişiklikləri: Bakı-Şuşa reysi necə fəaliyyət göstərəcək?
Hazırda sərnişinlər Laçına səfər etmək üçün Bakı-Xankəndi-Laçın reysindən istifadə edirlər. Yeni xətt işə düşdükdən sonra bu marşrut Bakı-Şuşa reysi kimi fəaliyyətini davam etdirəcək və son dayanacaq Şuşa şəhəri olacaq.
Bakı-Şuşa müntəzəm avtobus reysi gündə 2 dəfə həyata keçiriləcək. Avtobuslar Bakıdan saat 07:00 və 11:00-da, Şuşadan isə 17:00-da və növbəti gün saat 09:00-da yola düşəcək. Şuşa şəhərindən və digər aralıq məntəqələrdən çıxış vaxtlarında heç bir dəyişiklik edilməyib.
Biletlərin onlayn satışı və icazələr
Biletləri yalnız onlayn qaydada “biletim.az” portalı üzərindən əldə etmək mümkündür. Xatırladaq ki, Azərbaycan vətəndaşları portal və ya mobil tətbiq vasitəsilə bilet alarkən, işğaldan azad edilmiş ərazilərə giriş üçün icazələr avtomatik qaydada təqdim olunur.
