Fevralın 23-dən etibarən Sumqayıt-Laçın istiqamətində yeni müntəzəm avtobus reysi fəaliyyətə başlayır.
"Operativ Məlumat Mərkəzi-OMM" xəbər verir ki, bu barədə Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyi (AYNA) məlumat yayıb.
Cədvələ əsasən, avtobuslar hər gün Sumqayıt Avtovağzalından saat 07:00-da, əks istiqamətdə isə 17:30-da yola düşəcək. Bu istiqamət üzrə gediş haqqı 16,60 manat təşkil edir.
Marşrut üzrə Xocalı, Xankəndi və Şuşa şəhərləri aralıq dayanacaq kimi müəyyən edilib. Qiymətlər isə müvafiq olaraq Sumqayıt-Xocalı – 14,30 manat, Sumqayıt-Xankəndi – 14,80 manat, Sumqayıt-Şuşa – 15,20 manat məbləğindədir.
Biletləri yalnız onlayn qaydada, "biletim.az" portalı vasitəsilə əldə etmək mümkündür.
Xatırladaq ki, vətəndaşlar "biletim.az" saytı və ya mobil tətbiqindən bilet alarkən, işğaldan azad edilmiş ərazilərə giriş üçün icazələr avtomatik qaydada təqdim olunur.
