Azərbaycanda, xüsusilə Abşeron yarımadasında güclü şimal-qərb küləyi əsir, çovğun müşahidə olunur.
Milli Hidrometeorologiya Xidmətinin rəis müavini Gülnarə Abbasovanun "Operativ Məlumat Mərkəzi-OMM"-ə verdiyi məlumata görə, Bakıda və Abşeron yarımadasında küləyin maksimal sürəti 28 m/s-ə çatır.
Rəsminin sözlərinə görə, hazırda ölkə ərazisində hava şəraiti mürəkkəb sinoptik proseslərin təsiri altında formalaşıb:
"Fevralın 3-ü axşam saatlarından başlayaraq şimal-qərb istiqamətindən daxil olan arktik və Sibir mənşəli soyuq hava kütlələri temperaturun kəskin enməsinə və küləyin güclənməsinə səbəb olub. Eyni zamanda rütubətli Aralıq dənizi siklonu buludluluğu artıraraq yağış, bəzi yerlərdə sulu qar və qar yağmasına gətirib çıxarıb. Fərqli hava kütlələrinin qarşılıqlı təsiri nəticəsində atmosfer təzyiqi qradiyenti yüksəlib və qeyri-sabitlik müşahidə olunur".
Abbasova qeyd edib ki, küləkli hava şəraiti fevralın 5-i səhərədək davam edəcək. Onun sözlərinə görə, fevralın 4-dən 5-nə keçən gecə Abşeron yarımadasının bəzi yerlərində havanın minimal temperaturu 0-dan -2 dərəcəyə düşdüyü üçün yollarda buzlanma ehtimalı mövcuddur.
Bundan əlavə, bölgələrdə də intensiv yağıntılar gözlənilir. Xüsusilə dağlıq və dağətəyi rayonlarda yolların buz bağlaması ehtimalı yüksəkdir.
