OMM Redaksiyası
Qazaxıstanda ilk Astana AI Film Festivalı keçirilib. Bazar günü, oktyabrın 4-də baş tutduğu bildirilən tədbirə 125 ölkədən 8 mindən çox film təqdim olunub və festival süni intellektlə yaradılmış filmlərə həsr olunan dünyanın ən böyük beynəlxalq müsabiqəsi kimi təqdim edilib.
Festivalın baş mükafatını latviyalı rejissor Nikolay Şestakın “The First Honest Day” filmi qazanıb. O, 450 min dollar mükafat alıb. Hindistanın “SITARA” filmi ikinci yeri tutaraq 200 min dollar, İspaniyanın “Looking For Perseida” filmi isə üçüncü yerə görə 100 min dollar qazanıb.
Qazaxıstanlı rejissor “Ən yaxşı obraz” mükafatını alıb
Qazaxıstanlı Mirzaxan Jumaxan “It Was Just a Joke” filminə görə “Ən yaxşı obraz” mükafatına layiq görülüb. Komediyada itin və sahibinin qardaşının zarafat üstündə mübahisəsinin böyük büdcəli film səhnəsini xatırladan qarşıdurmaya çevrilməsi təsvir olunur.
Jumaxan hekayənin yaranmasına zarafatlara və yumora marağının ilham verdiyini deyib.
Minlərlə müraciət arasından müsabiqənin final mərhələsinə 25 film seçilib. Beynəlxalq münsiflər heyətində UNESCO-nun keçmiş baş direktoru Odri Azule, sahibkar və investor Balaci Srinivasan, eləcə də kino, texnologiya və akademiya sahələrinin nümayəndələri yer alıb.
Festivalın mükafat fondu 2 milyon dollar olub
Festivalın ümumi fondu 2 milyon dollar təşkil edib. Bunun 1 milyon dolları müsabiqə mükafatlarına, digər 1 milyon dolları isə perspektivli süni intellekt layihələrinə investisiyaya ayrılıb.
Üç gün davam edən festival oktyabrın 1-dən 3-dək Astana şəhərində, AI Month çərçivəsində və AI & Digital Bridge 2026 texnologiya konfransı ilə eyni vaxtda keçirilib. Təşkilatçılar tədbiri hər il keçirməyi planlaşdırdıqlarını bildiriblər.
Qazinform daha əvvəl Qazaxıstan Prezidenti Kasım-Jomart Tokayevin Astana AI Film Festivalının açılış mərasimində iştirak etdiyini xəbər verib.
