OMM Redaksiyası
Lixtenşteyn millisinin futbolçusu Aron Sele Azərbaycanla qolsuz heç-heçədən sonra komandasının oyuna xal qazanmaq inamı ilə çıxdığını deyib.
30 yaşlı yarımmüdafiəçi Azərbaycan yığmasını güclü komanda və keyfiyyətli futbolçulara malik rəqib kimi dəyərləndirib. Onun sözlərinə görə, Lixtenşteyn rəqibin səviyyəsini nəzərə alaraq hazırlaşıb, amma meydanda hər nəticənin mümkün olduğuna inanıb.
“Bu nəticə bizim üçün yaxşıdır”
Sele qarşılaşmanın çətin keçdiyini, komanda yoldaşlarının bütün gücünü ortaya qoyduğunu bildirib. Onun fikrincə, 0:0 hesabı Lixtenşteyn üçün yaxşı nəticədir.
Yarımmüdafiəçi komandasının ardıcıl 18 məğlubiyyətdən sonra ilk xalını qazandığını bilmədiyini söyləyib. Bununla belə, uzun fasilədən sonra xal əldə etməyin xoş hiss olduğunu vurğulayıb.
Komandanın hədəfi hər oyunda mübarizə aparmaqdır
Sele baş məşqçinin matçdan sonra futbolçuları təbrik etdiyini və onların həm bu görüşdə, həm də əvvəlki işlərində çox zəhmət çəkdiklərini söylədiyini qeyd edib. Lixtenşteyn millisinin bəzi üzvlərinin işlədiyini, bəzilərinin isə təhsil aldığını bildirən futbolçu, bütün bunlara baxmayaraq, komanda şəklində futbol oynamağa çalışdıqlarını deyib.
Onun sözlərinə görə, Lixtenşteyn hər qarşılaşmada mümkün qədər çox şey qazanmağa, sona qədər mübarizə aparmağa və öz səviyyəsini nəzərə alaraq əlindən gələni etməyə çalışacaq.
