Afət Ziyadqızı
İranla münaqişənin qısa müddətdə başa çatacağına dair ilkin proqnoza baxmayaraq, Vaşinqton Yaxın Şərqdə hərbi mövcudluğunu kəskin şəkildə artırır. ABŞ Prezidenti Donald Tramp seçkilərdən sonra gərginliyin daha da yüksələ biləcəyini və İrana qarşı yeni zərbələrin istisna olunmadığını bəyan edib.
"Operativ Məlumat Mərkəzi-OMM" xəbər verir ki, ABŞ Yaxın Şərq regionuna əlavə hərbi dəniz qüvvələri yönləndirir.
"USS Theodore Roosevelt" aviadaşıyıcı zərbə qrupu və "USS Makin Island" amfibiya qrupunun bölgəyə çatması ilə dəniz qüvvələrinin şəxsi heyəti 20 min nəfəri ötəcək, hərbi təyyarələrin sayı isə yüzlərlə olacaq. Oktyabrın sonunadək regionda eyni vaxtda üç ABŞ aviadaşıyıcısının yerləşdirilməsi nəzərdə tutulur.
ABŞ Prezidenti "Time" jurnalına müsahibəsində noyabrın 3-də keçiriləcək aralıq seçkilərdən sonra İrana qarşı hərbi əməliyyatların genişləndirilə biləcəyini vurğulayıb. D.Tramp Tehranın son atəşkəs təklifini, o cümlədən Hörmüz boğazının açılması ilə bağlı irəli sürdüyü şərtləri qənaətbəxş hesab etmədiyi üçün rədd etdiyini diqqətə çatdırıb.
Müharibənin aralıq seçkilərə təsirini qiymətləndirən ABŞ lideri İranın nüvə silahı əldə etməsinə icazə verilməyəcəyini və bu qətiyyətli mövqeyin amerikalı seçicilər tərəfindən dəstəklənəcəyinə inandığını bildirib.
