Afət Ziyadqızı
Birləşmiş Ştatların Hərbi Dəniz Qüvvələrinə məxsus üç aviadaşıyıcı zərbə qrupunun Yaxın Şərq regionuna doğru hərəkət etdiyi bildirilir. Bu barədə “The New York Times” (NYT) qəzeti adlarının açıqlanmasını istəməyən amerikalı yüksəkrütbəli rəsmilərə istinadən məlumat dərc edib.
"Operativ Məlumat Mərkəzi-OMM" xəbər verir ki, nəşrin məlumatına görə, ABŞ Prezidenti Donald Trampın tapşırığı ilə Müdafiə Nazirliyi (Pentaqon) tərəfindən İranın pilotsuz uçuş aparatları (PUA) və raket arsenalına, strateji enerji infrastrukturu obyektlərinə, həmçinin digər hərbi hədəflərə qarşı genişmiqyaslı zərbələr endirilməsi üçün yeni əməliyyat planları hazırlanır.
İddia olunur ki, təxminən üç gün davam edə biləcəyi proqnozlaşdırılan hərbi əməliyyatlar çərçivəsində İran İslam İnqilabı Keşikçiləri Korpusunun (SEPAH) komanda-idarəetmə mərkəzləri və strateji qərargahları da əsas hədəf nöqtələri sırasında yer alır.
Bununla belə, ABŞ Prezidenti Donald Tramp bəyanatla çıxış edərək Birləşmiş Ştatlarda noyabrın 3-də keçiriləcək Konqresə aralıq seçkilərə qədər İrana qarşı hər hansı hərbi hücumun həyata keçirilməyəcəyini vurğulayıb.
