OMM Redaksiyası
Azərbaycan və Lixtenşteyn milli komandaları UEFA Millətlər Liqasının qrup mərhələsində bu gün altıncı dəfə qarşılaşacaqlar. Əvvəlki beş oyunun üçündə Azərbaycan millisi qalib gəlib, bir görüşdə heç-heçə qeydə alınıb. Lixtenşteyn isə bir dəfə qələbə qazanıb.
Əvvəlki qarşılaşmalar
Komandaların ilk dueli 1998-ci ildə Avropa çempionatının seçmə mərhələsində Vadutsda keçirilib. Həmin görüşdə Lixtenşteyn 2:1 hesabı ilə qalib gəlib. Bu, rəqibin rəsmi matçlarda ilk qələbəsi olub.
1999-cu ildə eyni seçmə mərhələnin növbəti oyununda Azərbaycan millisi 4:0 hesabı ilə qalib gəlib.
Tərəflər 2008-ci ildə DÇ-2010-un seçmə mərhələsində qarşılaşıb. Bakıda keçirilən matç qolsuz heç-heçə ilə başa çatıb, Vadutsdakı oyunda isə Azərbaycan 2:0 hesabı ilə üstün olub.
Komandaların son görüşü 2013-cü ildə Dubayda keçirilən yoldaşlıq matçı olub. Azərbaycan millisi həmin oyunda 1:0 hesabı ilə qalib gəlib.
D Liqasının 2-ci qrupunun Azərbaycan – Lixtenşteyn qarşılaşması bu gün Tofiq Bəhramov adına Respublika stadionunda, saat 20:00-da başlayacaq.
