"Liverpool" klubunun baş məşqçisi Arne Slot komandanın transfer planlarına aydınlıq gətirib.
"Operativ Məlumat Mərkəzi-OMM" xəbər verir ki, niderlandlı mütəxəssis kütləvi oyunçu satışının planlaşdırılmadığını vurğulayıb.
Məşqçinin sözlərinə görə, klub ötən il xeyli sayda yeni futbolçu cəlb edib və buna böyük məbləğdə vəsait xərcləyib:
"Dörd transfer pəncərəsi ərzində xalis zərərimiz 150 milyon funt sterlinq təşkil edib. Bu, bizim necə bir klub olduğumuzu göstərir. Ən azı iki oyunçunu dəyişəcəyimizi bilirik, lakin Kostas geri qayıdır".
Slot həmçinin komandadakı bəzi əsas fiqurların vəziyyətinə də toxunub:
"İlk növbədə Mo (Məhəmməd Salah) ilə bağlı vəziyyətə necə reaksiya verəcəyimizi müəyyənləşdirməliyik. Onu bənzər bir oyunçu ilə əvəz edəcəyik, yoxsa fərqli bir addım atacağıq, buna qərar verilməlidir.
Hazırda komandadan çox sayda futbolçunun ayrılma ehtimalı yoxdur. Təbii ki, İbunun (İbrahima Konate) müqaviləsi ilə bağlı vəziyyət gündəmdədir.
İki mərkəz hücumçusu transfer etməyimiz çox yaxşı addım oldu. Əvvəlcə çoxları eyni tipli iki oyunçunun alınmasını tənqid etsə də, indi bunun doğru qərar olduğu görünür. Hətta yayda daha bir hücumçu alınmasının vacibliyi müzakirə edilir.
İsakın qayıtması sevindirici haldır, lakin o, hələ tam 90 dəqiqə oynamağa hazır deyil".
