Türkiyənin Antalya şəhərinin Ulupınar məhəlləsində yerləşən meşəlik ərazidə yanğın baş verib.
“Operativ Məlumat Mərkəzi – OMM” xəbər verir ki, hələlik müəyyən edilməyən səbəbdən başlayan yanğının ətrafa yayılma təhlükəsi yaranıb. Hadisə ilə əlaqədar əraziyə yanğınsöndürmə briqadaları cəlb olunub.
Hadisə yerinə çatan yanğınsöndürmə qrupları dərhal alovla mübarizəyə başlayıb. Yerli sakinlər də su daşıyaraq söndürmə işlərinə dəstək göstəriblər.
Yanğının söndürülməsi üçün 4 ədəd yanğınsöndürmə maşını (arazöz), 2 ədəd su təchizatı avtomobili, 2 ədəd ilkin müdaxilə vasitəsi və 50 nəfərlik texniki heyət və yanğınsöndürən cəlb edilib.
Görülən intensiv tədbirlər nəticəsində yanğın qısa müddət ərzində nəzarət altına alınıb. Hazırda ərazidə soyutma işləri aparılır.
