OMM Redaksiyası
Aİ tənzimləyiciləri “TikTok”u onlayn təhlükəsizlik qaydalarını pozmaqda ittiham edib. Onların xəbərdarlığına görə, platformanın asılılıq yaradan tövsiyə alqoritmi istifadəçilərin, xüsusilə uşaqların və yeniyetmələrin psixi sağlamlığına zərər vura bilər.
“AnewZ”in məlumatına görə, tənzimləyicilər cümə günü bildiriblər ki, narahatlıqlar aradan qaldırılmasa, “TikTok”un Çinli sahibi “ByteDance” qlobal illik dövriyyəsinin 6 faizinədək cərimələnə bilər.
Sosial media şirkətləri alqoritmlərini yenidən nəzərdən keçirmək üçün artan təzyiqlə üzləşirlər. Buna səbəb onların uşaqların psixi sağlamlığına təsiri ilə bağlı narahatlıqlardır. Bir sıra hökumətlər gənc istifadəçilərə məhdudiyyətlər tətbiq edib və ya bunu nəzərdən keçirir.
Avropa Komissiyası “TikTok”la bağlı ilkin nəticələrini açıqlayaraq platformanı tövsiyə sisteminin yaratdığı riskləri azaltmaq üçün yetərli tədbirlər görməməkdə günahlandırıb. Tənzimləyicilər kədər, təcrid və bədən görünüşünə həsr olunan videoların təkrar-təkrar istifadəçilərə göstərilməsinin, xüsusən də alqoritm oxşar məzmunu davamlı tövsiyə etdikdə, psixi sağlamlığa zərər vura biləcəyini bildiriblər.
“TikTok” ittihamları rədd edir
“TikTok” ilkin nəticələrlə qəti şəkildə razılaşmayıb, təhlükəsizlik tədbirlərini və platformanın iş prinsiplərini müdafiə edib. Şirkətin bəyanatında deyilir: “Komissiya platformamızın quruluşunu və istifadəçi təhlükəsizliyinə bağlılığımızı təhrif edən, mahiyyətcə qeyri-dəqiq bir sıra fikirlər səsləndirib”.
Şirkət əlavə edib: “İstifadəçilərə məzmun təcrübələrini birbaşa və intuitiv şəkildə idarə etmək imkanı verərkən icmamızı qorumaq sahəsində güclü fəaliyyət tarixçəmiz var”.
Komissiya “TikTok”un tövsiyə sistemində əhəmiyyətli dəyişikliklər edilməsini tələb edib. Qurumun xəbərdarlığına görə, sistemin quruluşu istifadəçiləri çox vaxt oxşar videoların ardıcıl göstərildiyi və “dovşan yuvası” adlandırılan dövrəyə sala bilər.
Aİ-nin texnologiya məsələləri üzrə komissarı Henna Virkkunen bəyanatında bildirib: “İstifadəçi “TikTok”da hər dəfə videonu sürüşdürəndə və ya bəyənəndə alqoritm ona daha çox oxşar məzmun təqdim edir və istifadəçiləri asanlıqla çıxa bilmədikləri ‘dovşan yuvalarına’ aparır”.
Tənzimləyicilər “TikTok”a “Sənin üçün” lentini yenidən qurmağı, istifadəçilərin bildirdiyi seçimlərə daha çox üstünlük verməyi, məzmun nəzarəti vasitələrini tapıb işlətməyi asanlaşdırmağı və mümkün riskləri qiymətləndirmək üçün alqoritmi müntəzəm sınaqdan keçirməyi tövsiyə ediblər.
Araşdırma Rəqəmsal Xidmətlər Aktı çərçivəsində aparılır
İlkin nəticələr Aİ-nin Rəqəmsal Xidmətlər Aktı çərçivəsində aparılan daha geniş araşdırmanın bir hissəsidir. Qanun böyük onlayn platformalardan qanunsuz məzmunla mübarizə aparmağı və xidmətləri ilə bağlı riskləri aradan qaldırmağı tələb edir.
Fevralda Aİ tənzimləyiciləri “TikTok”u asılılıq yaradan dizayn xüsusiyyətlərindən istifadə etməkdə, uşaqları yetərincə qorumamaqda və tədqiqatçıların açıq məlumatlara çıxışını çətinləşdirməkdə də ittiham ediblər. “TikTok” həmin ilkin nəticələri “qəti şəkildə yalan” adlandırıb və onlara etiraz edəcəyini bildirib.
Komissiya ayrıca “Meta Platforms”un “Facebook” və “Instagram” platformalarındakı tövsiyə sistemlərinin də oxşar “dovşan yuvası” effekti yaradıb-yaratmadığını araşdırır. Bu araşdırmalar sosial media alqoritmlərinin istifadəçi davranışına və rifahına təsiri ilə bağlı daha geniş suallar doğurur.
