OMM Redaksiyası
Avropa İttifaqının bazar ertəsi Rusiyaya qarşı yeni sanksiyalar paketini təsdiqləyəcəyi gözlənilir. Fransanın Avropa məsələləri naziri Benjamin Haddad cümə axşamı bildirib ki, tədbirlər əlavə 150 qurum və 50 bankı hədəfə alacaq.
AnewZ-nin məlumatına görə, Haddad Fransanın “LCI” telekanalına müsahibəsində sanksiya paketinə daxil ediləcək qurumların əksəriyyətini Fransanın təklif etdiyini deyib. “Bazar ertəsi Rusiyaya qarşı 150 əlavə qurum və 50 bankı əhatə edən yeni sanksiyalar qəbul edəcəyik. Əlavə olunacaq qurumların böyük hissəsini Fransa təklif edib”, – nazir bildirib.
Oktyabr paketinə 1 646 ad daxil edilmişdi
Yeni tədbirlər Aİ səfirlərinin oktyabrda Rusiyaya qarşı sanksiya siyahısını 1 646 ad artırmaq barədə razılığından sonra gündəmə gəlib. Bu genişləndirmə blokun sanksiyalar siyahısında indiyədək edilən ən böyük birdəfəlik artım kimi təqdim olunmuşdu.
Oktyabr paketində Moskvanın Ukraynadakı müharibəsinə dəstək verməkdə ittiham olunan 743 şəxs və 826 qurum, eləcə də Rusiyanın nəzarətində olan Ukrayna ərazilərində seçkilərdə iştirak etmiş 77 qanunverici yer almışdı. Siyahıya daxil edilənlərə qarşı səyahət qadağaları, aktivlərin dondurulması və maliyyə dəstəyinin göstərilməsinə məhdudiyyətlər nəzərdə tutulmuşdu.
Fransa Rusiyanın giriş qadağalarını qınayıb
Haddad Moskvanın çərşənbə günü iki fransalı jurnalistin və iki qanunvericinin Rusiyaya girişini qadağan etməsini də qınayıb. Qadağa “Le Monde” qəzetinin müxbiri Ariane Cheminə, sərbəst jurnalist və Moskvanın keçmiş müxbiri Paul Gogoya, habelə Fransa qanunvericiləri Sacha Houlié və Arthur Delaportea şamil edilib.
“Bu, hədə-qorxudur. Fransa qorxudulmayacaq. Düşünürəm ki, bu qanunvericilər və jurnalistlər öz işlərini görürlər; qanunvericilər, xüsusilə, xarici müdaxilələrlə mübarizədə fəaldırlar”, – Haddad deyib. O, sosial şəbəkədəki paylaşımında da Kremlə müraciətlə Fransa parlamentinin üzvlərinin müdafiə etdiklərini və jurnalistlərin yazdıqlarını seçə bilməyəcəyini bildirib, girişinə qadağa qoyulan şəxslərə dəstək ifadə edib.
Bu mübahisə Parislə Moskva arasındakı münasibətləri daha da gərginləşdirib. Fransanın xarici işlər naziri Jan-Noel Barro “X” sosial şəbəkəsində yazıb ki, Rusiyanın giriş qadağalarını Fransanın iyulda Xenia Fedorovanı ölkədən çıxarmasına cavab kimi əsaslandırması onun Rusiya hakimiyyəti ilə əlaqələrini “təsdiqləyib”.
Fransa hakimiyyətinin Rusiya təbliğatını yaymaqda ittiham etdiyi Fedorova əvvəllər “RT France” telekanalına rəhbərlik edib. Daha sonra o, Fransanın “CNews” xəbər kanalında və onunla əlaqəli “Europe 1” və “JDNews” nəşrlərində tanınan simalardan birinə çevrilib. Hər üç media qurumu media maqnatı Vincent Bolloré-yə məxsusdur.
