ABŞ Yəməndə husilərə məxsus pilotsuz təyyarələrə hava zərbələri endirib.
"Operativ Məlumat Mərkəzi-OMM" xəbər verir ki, CNN telekanalı bu barədə ABŞ-ın rəsmi nümayəndəsinə istinadla məlumat yayıb.
Məlumata görə, “F-18 Super Hornets” qırıcıları Yəmənin qərbində buraxılmaq üçün hazırlanan 10 pilotsuz aparatı məhv edib. Bu zərbələr husilərin silah anbarlarına edilən hücum seriyasının sonuncusu olub.
Eyni zamanda, ABŞ-ın hərbi gəmisi Yəmən husiləri tərəfindən buraxılan üç pilotsuz uçan aparatı və ballistik raketi vurub.
Husilərin Ədən körfəzi istiqamətində atdıqları gəmi əleyhinə raketin ABŞ Hərbi Dəniz Qüvvələrinin "Carney" esminesi tərəfindən vurulduğu bildirilir. Bundan təxminən bir saat sonra esminesə yaxınlaşan daha üç pilotsuz uçuş aparatı da zərərsizləşdirilib.
