OMM Redaksiyası
ABŞ Dövlət Departamenti Ukraynaya hava hücumundan müdafiə imkanlarının təkmilləşdirilməsi, eləcə də bununla bağlı avadanlıq və xidmətlərin satışı üzrə 2,7 milyard dollarlıq mümkün hərbi sazişi təsdiqləyib.
Paketə raketlər, hava hücumundan müdafiə sistemləri, buraxılış qurğularının modifikasiyası və dronlara qarşı radarlar daxildir. Sazişin qüvvəyə minməsi üçün onun ABŞ Konqresində nəzərdən keçirilməsi tələb olunur.
Ukrayna sövdələşmə baş tutacağı təqdirdə ödənişi Avropanın ayırdığı və keçmiş prezident Co Baydenin dövründə ABŞ-ın Xarici Hərbi Maliyyələşdirmə proqramı çərçivəsində nəzərdə tutulmuş vəsait hesabına həyata keçirəcək.
Bu qərar ABŞ Prezidenti Donald Trampın Rusiyaya qarşı yeni sanksiyalar haqqında qanunu imzalamasından sonra açıqlanıb. Qanun Moskva üzərində iqtisadi təzyiqi artırır.
Ukrayna hakimiyyətinin məlumatına görə, son 24 saat ərzində Rusiyanın Xarkov, Donetsk və Xerson vilayətlərinə hücumları nəticəsində azı 8 nəfər ölüb, 33 nəfər yaralanıb.
Xarkov vilayətində 15 yaşayış məntəqəsinin atəşə tutulması nəticəsində 5 nəfər ölüb, 15 nəfər yaralanıb. Donetsk vilayətində bir nəfər ölüb, 13 nəfər yaralanıb. Xerson vilayətində isə 2 nəfər ölüb, 5 nəfər yaralanıb; 5 çoxmənzilli bina və 7 fərdi evə ziyan dəyib.
Sumı şəhərində Rusiyanın idarəolunan bombası doqquzmərtəbəli yaşayış binasına düşüb. Şəhər meri Artem Kobzarın bildirdiyinə görə, hadisə nəticəsində 2 nəfər ölüb, 8 nəfər yaralanıb. Bununla son 24 saatda Rusiyanın Ukraynaya hücumları nəticəsində ölənlərin sayı azı 10 nəfərə çatıb.
Rusiya Prezidenti Vladimir Putin Ukraynanı müharibənin dayandırılması ilə bağlı danışıqlara mane olmaqda və Rusiyada keçirilən parlament seçkilərinə müdaxilə etməkdə ittiham edib. O, həmçinin Rusiyanın nüvə üçlüyünə əsaslanan müdafiə siyasətini və raket əleyhinə müdafiənin gücləndirilməsinin vacibliyini vurğulayıb.
Ukrayna Prezidenti Volodimir Zelenski isə Donald Trampa Rusiyaya qarşı sanksiyalar haqqında qanunu imzaladığı üçün təşəkkür edib.
