OMM Redaksiyası
Ukrayna Rusiyanın neft emalı zavodlarına zərbələri bərpa edəcək. Prezident Volodimir Zelenski bu barədə cümə axşamı dərc olunan müsahibəsində “Financial Times”a danışıb.
“Neft emalı zavodlarına hücumlarla bağlı məhdudiyyət aradan qalxıb. Bitdi”, – Zelenski deyib.
Ukrayna ABŞ prezidenti Donald Trampın enerji atəşkəsi elanından sonra Rusiyanın enerji infrastrukturuna hücumları iki gün müddətinə dayandırmışdı.
Zelenski Vaşinqtonun Moskva ilə, o cümlədən dizel tədarükü barədə son razılaşma çərçivəsində işgüzar əlaqələr qurmasını tənqid edib. O, ABŞ-ı Kiyevə zərbələri dayandırması üçün təzyiq göstərmək məqsədilə hərbi dəstəyi məhdudlaşdırmaqda ittiham edib.
Ukrayna prezidenti ölkəsinin yaxınlaşan ballistik raketlər barədə ABŞ-ın erkən xəbərdarlıq məlumatlarına çıxışını itirdiyini, həmçinin “Starlink” rabitəsinin ölkə üzrə zəiflədiyini iddia edib. Zelenski fasilələrin texniki problemlə bağlı olduğu izahını qəbul etməyib.
“Bu, texniki problem deyildi, iradə məsələsi idi”, – Zelenski “Financial Times”a bildirib.
O, Vaşinqton əlavə ABŞ istehsalı olan “Patriot” raketəleyhinə qurğuların qarşısınıalan raketlərini təqdim edərsə, Ukraynanın Rusiyanın enerji infrastrukturuna zərbələri dayandırmağı nəzərdən keçirə biləcəyini deyib. Zelenski bunu qəbul edilə biləcək minimum şərt adlandırıb.
