Afət Ziyadqızı
ABŞ Dövlət Departamenti Suriyanı müdafiə təyinatlı məhsul və xidmətlərin ixracı və idxalı üçün lisenziyaların avtomatik rədd edildiyi ölkələr siyahısından çıxarıb. Müvafiq dəyişiklik Beynəlxalq Silah Ticarəti Qaydalarında (ITAR) rəsmən təsbit olunub.
"Operativ Məlumat Mərkəzi-OMM" xəbər verir ki, Federal Reyestrdə dərc olunan yekun sənədə əsasən, bu addım ABŞ dövlət katibinin 2026-cı il avqustun 19-da qəbul etdiyi yeni müdafiə ticarəti siyasətinə uyğun olaraq atılıb.
Yeni qaydalara əsasən, Suriyaya müdafiə təyinatlı malların və xidmətlərin ötürülməsi ilə bağlı müraciətlər əvvəlki ümumi qadağa əvəzinə, fərdi qaydada və hər bir hal üzrə ayrıca qiymətləndiriləcək.
Bəyanatda vurğulanır ki, Suriyanın statusunun dəyişməsi terrorizmə dəstək verən dövlət siyahısından çıxarılması da daxil olmaqla, lazımi hüquqi prosedurlar icra edildikdən və ABŞ qanunvericiliyindəki müvafiq məhdudiyyətlər ləğv olunduqdan sonra mümkün olub.
Xatırladaq ki, Vaşinqton Suriyaya qarşı ilk müdafiə ticarəti məhdudiyyətlərini 1979-cu il dekabrın 29-da tətbiq etmişdi.
