ABŞ İrana qarşı iqtisadi təzyiqləri daha da artırmaq məqsədilə yeni əməliyyata başlayıb.
“Operativ Məlumat Mərkəzi – OMM” xəbər verir ki, ABŞ Xəzinədarlıq naziri Skott Bessent “İqtisadi Xaricetmə Əməliyyatı”nın (Economic Exclusion Operation) icrasına başlanıldığını açıqlayıb.
Bildirilib ki, əməliyyatın əsas məqsədi Tehran hakimiyyətinin iqtisadi imkanlarını məhdudlaşdırmaq və İranın maliyyə resurslarına çıxışını zəiflətməkdir.
Yeni sanksiyalar çərçivəsində İran İnqilab Keşikçiləri Korpusu da birbaşa hədəfə alınıb. Bessent bu addımların İran rejimini ciddi iqtisadi çətinliklərlə üz-üzə qoyacağını bildirib.
Sanksiyalar rəqəmsal aktivlər və maliyyə texnologiyaları, qızıl ticarəti, aviasiya və dənizçilik sektorları, eləcə də texnoloji avadanlıqları əhatə edir.
ABŞ administrasiyası İran neftinin qeyri-qanuni yollarla satışına dəstək verən və bank sistemlərindən Tehranın maraqları naminə istifadə edən ölkələrə də xəbərdarlıq edib.
Bessentin sözlərinə görə, Donald Tramp administrasiyası İranın yaratdığı təhdidləri yalnız idarə etməyi deyil, onları tamamilə aradan qaldırmağı hədəfləyir. Nazir ABŞ iqtisadiyyatının bu uzunmüddətli maliyyə əməliyyatını dəstəkləmək üçün kifayət qədər güclü olduğunu vurğulayıb.
