Afət Ziyadqızı
ABŞ Prezidenti Donald Trampın Şimali Koreyaya qarşı hərbi təlimləri “uyğunsuz və təxribatçı” adlandıraraq Pentaqona bu fəaliyyətləri məhdudlaşdırmaq tapşırığı verməsi ABŞ-Cənubi Koreya ittifaqında narahatlıq yaradıb.
“Operativ Məlumat Mərkəzi – OMM” xəbər verir ki, sözügedən qərardan xəbərsiz olan Cənubi Koreya rəhbərliyi və xarici işlər naziri Ço Hyun bu addımı Vaşinqtonla Seul arasındakı müdafiə əməkdaşlığı baxımından ciddi məsələ kimi qiymətləndirib.
“Atlantic Council”ın eksperti Jo Biyun xəbərdarlıq edib ki, hərbi təlimlərin qəfil dayandırılması Cənubi Koreyanın ABŞ-yə olan inamını sarsıda bilər.
Seulda narahatlıqlar təkcə hərbi təlimlərlə məhdudlaşmır. Vaşinqtonun Cənubi Koreyada yerləşən 27 minə yaxın ABŞ hərbçisini geri çəkə biləcəyi və ya Seulla məsləhətləşmədən Şimali Koreyanın nüvə dövləti statusunu tanıya biləcəyi ehtimalı da ciddi təşviş doğurur.
Bundan əlavə, Tramp administrasiyasının ticarət və təhlükəsizlik məsələlərini bir-biri ilə əlaqələndirməsi də müttəfiqlər arasında fikir ayrılıqlarını artırır. ABŞ Prezidenti Cənubi Koreyanın hərbi xərclərə ayırdığı 1 milyard dolları kifayət hesab etmir və Seulun İrana qarşı hərbi təşəbbüslərə qoşulmamasını tənqid edir.
