Əli Məmmədli
Məlum olduğu kimi, bir neçə gündür Gədəbəyin Söyüdlü kəndində qızıl yataqları ilə əlaqədar süni gölün salınmasına görə, mübahisələr səngimir. Mütəxəssislərin fikrinə görə, gölün salınması ciddi ekoloji problemlərə gətirib çıxara bilər.
Milli Ekoloji Proqnozlaşdırma Mərkəzinin rəhbəri, ekoloq Telman Zeynalov "Operativ Məlumat Mərkəzi-OMM"-yə açıqlamasında bildirib ki, qızıl yataqlarını emal edən şirkət mütləq sianid turşusuna qarşı təmizləyici qurğu quraşdırmalıdır.
Mütəxəssis qeyd edib ki, təmizləyici qurğusu olmayan təşkilat bağlanmalıdır:
“Sovet dövründə də bu, qanun idi. Bu kimi təşkilatlarda mütləq şəkildə təmizləyici qurğu olmalıdır. Təmizləyici qurğu olmadığı halda bu, insanların və təbiətin məhvinə gətirib çıxara bilər”.
Telman Zeynalov qeyd edib ki, sianid olduqca təhlükəli maddədir.
“Hazırkı dövrdə ikinci bir göl salınarsa, həm ekologiya üçün, həm də insanlar üçün çox ciddi problemlərə gətirib çıxara bilər. Orada təmizləyici qurğunun qurulması mütləqdir. Ekologiya və Təbii Sərvətlər Nazirliyi bu işə ciddi nəzarət etməlidir. Bir daha qeyd edirəm ki, əgər bir təşkilatın təmizləyici qurğusu yoxdursa, onun fəaliyyəti dayandırılmalıdır”.
Məlik Məlikov
