"ABŞ prezidenti Donald Trampın Rusiya ilə bağlı mənfi fikirləri kifayət qədər sərt olmayıb, həmçinin ABŞ-nin Ukraynaya göstərdiyi yardım Qərbin gözlədiyindən az olub".
"Operativ Məlumat Mərkəzi-OMM" xəbər verir ki, bu fikirlər Almaniyanın "Der Spiegel" qəzetinin analitik məqaləsində yer alıb.
"Ukrayna yəqin ki, yaxın vaxtlarda çox ehtiyac duyduğu hərbi texnikanı alacaq. Lakin Rusiya prezidenti Vladimir Putin növbəti dəfə vaxt udmağı bacardı. Vaşinqtonda və bir sıra Avropa paytaxtlarında gözləntilər fərqli idi”, - məlumatda deyilir.
Nəşrin yazdığına görə, Vaşinqton administrasiyasının rəhbəri Ukraynadakı münaqişənin nizamlanması məsələsinə ABŞ-nin maraqları prizmasından yanaşır . Bu isə Avropa ictimaiyyətini qane etmir. Kiyevə çatdırılan silahların miqdarı ilə bağlı məlumatlar qeyri-müəyyəndir, məlum olan texnika isə ABŞ büdcəsindən deyil, əsasən Avropa İttifaqına üzv ölkələrin hesabına maliyyələşəcək və nəticədə bu, Amerika üçün əlavə iqtisadi fayda verəcək.
Bundan əlavə, nəşrin qeyd etdiyinə görə, Tramp Putinə öz narazılığını bildirməsinə baxmayaraq, ona komplimentlər etməkdən çəkinmir.
