Tokio Rusiyanın Koreya Xalq Demokratik Respublikasına (Şimali Koreya) hərbi yardım göstərə biləcəyinə inanır və Yaponiya Moskva ilə Pxenyan arasında münasibətlərin inkişafını artan narahatlıqla izləyir.
"Operativ Məlumat Mərkəzi-OMM" xəbər verir ki, bu barədə Yaponiyanın xarici işlər naziri Yoko Kamikava mətbuat konfransında bildirib.
Kamikava Şimali Koreyanın Rusiyaya müxtəlif silahlar ötürdüyü iddiasını təkrarlayıb.
Yaponiyanın xarici işlər naziri Şimali Koreya ilə istənilən silah ticarətinin BMT Təhlükəsizlik Şurasının qətnamələrinin pozulması olduğunu vurğulayıb və beynəlxalq ictimaiyyəti bu qətnamələrə tam əməl etməyə çağırıb.
Tokionun baş diplomatı Rusiya prezidenti Vladimir Putinin Şimali Koreyaya səfəri ehtimalını şərh etməkdən imtina edib. Yaponiya Nazirlər Kabinetinin Baş Katibi Yoşimasa Hayaşi əvvəllər vurğulamışdı ki, Yaponiya hökumətinin məsələ ilə bağlı şərh verməsi üçün yaxşı vaxt deyil. Eyni zamanda, həm Kamikava, həm də Hayaşi Yaponiya tərəfinin Rusiya-Şimali Koreya münasibətlərinin inkişafını diqqətlə izlədiyini qeyd ediblər.
Rusiya Xarici İşlər Nazirliyinin sözçüsü Mariya Zaxarova dəfələrlə vurğulayıb ki, Qərb ölkələrinin Rusiya ilə Şimali Koreya arasında qeyri-qanuni hərbi-texniki əməkdaşlıqla bağlı ittihamları əsassızdır. Bundan əvvəl Rusiyanın xarici işlər naziri Sergey Lavrov Vaşinqtonun Pxenyanın Moskvaya hərbi yardım göstərməsi ilə bağlı şayiələrini təkzib edib.
