Çin və ABŞ arasında münasibətlərin xarakteri təkcə iki ölkə xalqlarının rifahına deyil, həm də bəşəriyyətin gələcəyinə təsir göstərir.
"Operativ Məlumat Mərkəzi-OMM" TASS-a istinadən xəbər verir ki, bunu Pekində Böyük Xalq Zalında ABŞ işgüzar dairələrinin nümayəndələri ilə keçirilən görüşdə Çin Xalq Respublikasının sədri Si Cinpin deyib.
Onun sözlərinə görə, iki ölkə xalqlarının rifahı, eləcə də bəşəriyyətin gələcəyi, taleyi Çin və ABŞ əməkdaşlığından və ya bir-biri ilə qarşıdurmasından asılıdır.
“Nə qədər ki, hər iki tərəf bir-birini tərəfdaş sayarsa, bir-birinin maraqlarına hörmət edərsə, dinc yanaşı yaşayarsa və qarşılıqlı faydalı nəticələr üçün əməkdaşlıq edərsə, ikitərəfli münasibətlər yaxşılaşacaq”, - Çin sədri vurğulayıb.
Si Cinpin sonda mübadilənin intensivliyinin artacağına ümid etdiyini bildirib.
