Rusiya ilə Efiopiya arasında dəniz qüvvələrinin birgə təlimlərinin təşkilini nəzərdə tutan əməkdaşlıq müqaviləsi imzalanıb.
"Operativ Məlumat Mərkəzi-OMM" xəbər verir ki, bu barədə “Addis Standard” qəzeti məlumat yayıb.
Müvafiq sənədlər Rusiya Hərbi Dəniz Qüvvələri komandanının müavini admiral Vladimir Vorobyovun Efiopiyanın paytaxt yaxınlığındakı Bişoftu şəhərindəki hərbi dəniz obyektlərinə səfərinin yekunları üzrə imzalanıb.
Efiopiya Hərbi Dəniz Qüvvələri komandanının müavini Cemal Tufisu bildirib ki, iki ölkə arasında əməkdaşlıq əsasən hərbi kadrların hazırlanması və Efiopiya Hərbi Dəniz Qüvvələrinin potensialının artırılmasına yönələcək.
Qəzetin məlumatına görə, Rusiya Hərbi Dəniz Qüvvələrinin nümayəndə heyəti ilk dəfə 2022-ci ilin fevralında Efiopiya Hərbi Dəniz Qüvvələrinin qərargahına səfər edib. Həmin vaxt Rusiya Hərbi Dəniz Qüvvələri ilə kadr hazırlığında birgə iş haqqında razılıq əldə edilib. Efiopiya dənizə çıxışı olmayan ölkə olsa da, naviqasiya, mühəndislik, elektrik enerjisi, rabitə və silahlar kimi sahələrdə hərbi ekspertlər hazırlayır.
