HƏMAS ABŞ Prezidenti Donald Trampın Qəzzada atəşkəs və əsir mübadiləsi ilə bağlı təqdim etdiyi plana yaxın zamanda cavab verəcəyini bildirib.
"Operativ Məlumat Mərkəzi-OMM" xəbər verir ki, bununla bağlı HƏMAS-ın Siyasi Bürosunun üzvü Məhəmməd Nezzal mətbuata verdiyi açıqlamada deyib.
“Planın 30 sentyabrda elan olunmasından sonrakı gündən etibarən HƏMAS Fələstinli qruplar, müstəqil şəxsiyyətlər və vasitəçilərlə həm ölkə daxilində, həm də xaricdə məsləhətləşmələrə başlayıb. Əlimizdə bir çox tənqidlər olsa da, təşkilat məsələni tam ciddiyyətlə araşdırır”, - o qeyd edib.
Nezzal bildirib ki, HƏMAS planı ciddi şəkildə dəyərləndirir və tezliklə cavab verəcək.
O, son mövqelərinin Fələstin xalqının ali mənafelərini və Fələstin məsələsinin strateji prinsiplərini nəzərə alaraq müəyyənləşdiriləcəyini vurğulayıb: “Bizdən planı ya tam qəbul, ya da tam rədd etmək kimi bir yanaşma gözlənilməməlidir. Zaman təzyiqi və hədələrlə hərəkət etmirik” .
