Afət Ziyadqızı
ABŞ Prezidenti Donald Trampın İranla bağlı yürütdüyü siyasət və bu istiqamətdəki bəyanatları ciddi tənqidlərlə üzləşib.
"Operativ Məlumat Mərkəzi-OMM" xəbər verir ki, bu barədə "The New York Times" nəşri xarici siyasət ekspertlərinə istinadən məlumat yayıb.
Bildirilib ki, Vaşinqton Yaxın Şərqdəki gərginliyi idarə etməkdə çətinlik çəkir. Tramp çıxışlarında qələbə qazandığını iddia etsə də, ekspertlər reallığın fərqli mənzərə ortaya qoyduğunu bildirirlər.
Respublikaçı strateq və Dövlət Departamentinin keçmiş əməkdaşı Metyu Bartlett ABŞ-nin nə qələbə, nə də müharibədən çıxış üçün konkret planının olmadığını deyib.
Onun sözlərinə görə, strategiyanın həm ritorik, həm də praktiki addımlar baxımından daim təkrarlanması narahatedici vəziyyət yaradır.
Bartlett Trampın iranlıları hökuməti nəzarətə götürməyə çağırmasını da tənqid edib. Ekspertin fikrincə, bu cür bəyanatlar Ağ Evin İranla bağlı real strategiyasının olmadığını göstərir.
Yaranmış gərginlik fonunda ABŞ-nin müdafiə naziri Pit Hegsetin Yaxın Şərqdəki qoşunların dislokasiya müddətini səssizcə uzatması da diqqət çəkib.
Mənbələrin verdiyi məlumata görə, bu addım münaqişənin gələn ilə qədər davam edə biləcəyinə işarə edir.
