Afət Ziyadqızı
ABŞ-nin Hörmüz boğazında neft tankerlərinin təhlükəsiz keçidini təmin etmək məqsədilə xüsusi əməliyyat həyata keçirdiyi iddia olunur.
“Operativ Məlumat Mərkəzi – OMM” xəbər verir ki, “Axios” nəşrinin ABŞ rəsmilərinə istinadən yaydığı məlumata görə, bir neçə həftədir davam edən əməliyyat çərçivəsində hər gecə 15-20 neft tankeri Hürmüz boğazının cənub kanalından keçərək bölgəyə daxil olur və oranı tərk edir.
ABŞ rəsmilərinin iddiasına əsasən, bu marşrut vasitəsilə gündəlik təxminən 10 milyon barel neft dünya bazarlarına çatdırılır. Bu göstərici müharibədən əvvəlki səviyyənin təxminən yarısı olsa da, qlobal enerji təchizatında daha böyük fasilələrin qarşısının alınmasında mühüm rol oynayır.
Məlumata görə, əməliyyat yalnız yüklənmiş tankerlərin boğazdan təhlükəsiz çıxışını deyil, boş tankerlərin Oman dənizindən Hörmüz boğazı vasitəsilə Bəsrə körfəzinə daxil olmasını da əhatə edir.
Gəmilərin hər gecə müəyyən edilmiş vaxt aralığında iki ayrı konvoy şəklində hərəkət etdiyi bildirilir. Keçidlərin ABŞ ordusunun yönləndirmələri ilə həyata keçirildiyi qeyd olunur.
İddiaya görə, əməliyyat ABŞ Mərkəzi Komandanlığının (CENTCOM) İranın radar və dəniz müşahidə sistemlərinə qarşı həyata keçirdiyi iki həftəlik hərbi əməliyyatlardan sonra mümkün olub.
Əməliyyatın ABŞ-nin Şimali Karolina ştatında yerləşən Fort Bragg bazasından idarə edildiyi bildirilir.
