Efiopiya insan alveri ilə bağlı 5 nəfəri ölüm cəzasına məhkum edib. Bu maddə ilə ölkədə ilk dəfədir ki, belə bir hökm çıxarılır.
"Operativ Məlumat Mərkəzi-OMM" xəbər verir ki, bu barədə "Afrikanews" məlumat yayıb.
Qrupun Afrika Buynuzu miqrantlarının iş axtarmaq üçün Qırmızı dəniz və Yəmən vasitəsilə Körfəz ölkələrinə getdiyi “şərq marşrutu” üzrə fəaliyyətinə görə qınanıldığı bildirilir.
Hökm əsasən efiopiyalı miqrantlardan ibarət 154 nəfərin olduğu qayığın pis hava şəraiti səbəbindən Ədən körfəzində batması ilə bağlı verilib.
Ən azı 68 nəfər suda boğulub, onlarla insan itkin düşüb. Portal bildirir ki, bu faciə miqrantların insan alverçilərinin əlinə düşdüyü zaman üzləşdikləri ölümcül təhlükəni vurğulayır. Rəsmilər bu qərarı insan alverinə qarşı mübarizədə dönüş nöqtəsi kimi qiymətləndiriblər.
