OMM Redaksiyası
Almaniyada 2026-cı ilin əvvəlindən etibarən həddindən artıq isti hava ilə əlaqəli ölənlərin sayının təxminən 12 min 500 nəfərə çatdığı bildirilir.
“Operativ Məlumat Mərkəzi-OMM” xəbər verir ki, bununla bağlı Robert Kox İnstitutunun (RKI) avqustun 2-dək olan dövrü əhatə edən hesabat yayıb.
Bildirilib ki, ilin 15-ci həftəsindən 31-ci həftəsinə qədər Almaniyada həddindən artıq isti ilə əlaqəli təxminən 12 min 500 ölüm qeydə alınıb.
Hesabatda son 10 ildə xüsusilə 2018 və 2019-cu illərdə isti hava ilə əlaqəli ölüm hallarının yüksək olduğu xatırladılıb.
Belə ki, 2018-ci ildə 9 min 400, 2019-cu ildə isə 7 min 700 nəfərin həddindən artıq isti səbəbilə həyatını itirdiyi bildirilib.
RKI xüsusilə yaşlı insanların isti havadan daha çox təsirləndiyini vurğulayıb.
Bu ilin avqustun 2-dək qeydə alınan ölümlərin 6 min 270-nin 85 yaşdan yuxarı şəxslərin payına düşdüyü qeyd edilib.
Məlumata görə, ölənlər arasında 65-74 yaş aralığında 1 900, 75-84 yaş aralığında isə 3 110 nəfər olub.
Hesabatda bu il isti havanın ən güclü təsir göstərdiyi 26-cı həftədə ölüm hallarının xüsusilə yüksək olduğu bildirilib.
İyunun 22-dən 29-dək olan dövrdə təxminən 9 min 600 nəfərin həddindən artıq isti ilə əlaqəli səbəblərdən öldüyü təxmin edilir.
Həmin dövrdə Avropanı bürüyən isti hava dalğası Almaniyada da ciddi təsir göstərib. İyunun 28-də Brandenburq əyalətinin Oder-Şpree bölgəsində yerləşən Nayssemünde qəsəbəsinin Koşen rayonunda temperatur 41,7 dərəcəyə yüksələrək rekord həddə çatıb.
RKI-nin iyulun 9-da yayımladığı əvvəlki hesabatda isə 2026-cı ilin 15-ci həftəsindən 26-cı həftəsinə qədər Almaniyada həddindən artıq isti ilə əlaqəli təxminən 5 min 120 ölümün qeydə alındığı bildirilmişdi.
