Afət Ziyadqızı
Amerika kəşfiyyatı ABŞ-ın İranın yalnız bir nüvə obyektinə - Fordoya əhəmiyyətli zərər vurduğu qənaətinə gəlib.
"Operativ Məlumat Mərkəzi-OMM" xəbər verir ki, bu barədə Washington Post (WP) mənbələrə istinadən yazıb.
Məlumata görə, İsfahan və Natanz obyektlərində dəyən ziyanın miqyası hələ məlum deyil və bu obyektlər hələ də fəaliyyət göstərə bilər.
ABŞ rəsmisi İranın nüvə infrastrukturu ilə bağlı deyib: “Biz onun tamamilə məhv edildiyini dəqiq deyə bilmərik”. Konqresə yaxın mənbə nəşrə bildirib ki, Fordo obyektinin məhv edilməsi məqsədi “görünür, əldə olunub”.
Mənbə yazır ki, ABŞ kəşfiyyat agentlikləri Natanz və İsfahan nüvə obyektlərinin "tamamilə məhv edilmədiyi" qənaətinə gəliblər və zərərin həcminin qiymətləndirilməsi davam edir.
Mənbələrin bildirdiyinə görə, Vaşinqton hələ də zənginləşdirilmiş uran ehtiyatlarının Amerikanın hücumu zamanı ən çox zərər görən İranın Fordo nüvə obyektindən köçürülüb-köçürülmədiyini bilmir.
