Teymur Yusif oğlu Musayev

Teymur Yusif oğlu Musayev 1970-ci il sentyabrın 16-da Bakı şəhərində anadan olub. 1977–1981-ci illərdə Əlcəzair Xalq Demokratik Respublikasındakı SSRİ Baş Konsulluğu nəzdindəki 1 saylı orta məktəbdə, 1981–1987-ci illərdə Bakıdakı 189 saylı orta məktəbdə oxuyub. 1987-ci ildə Azərbaycan Dövlət Tibb İnstitutunun I müalicə-profilaktika fakültəsinə qəbul olub və 1993-cü ildə fərqlənmə diplomu ilə bitirib.

2000-ci ildə tibb üzrə namizədlik dissertasiyasını müdafiə edib. 2003–2004-cü illərdə Fransanın I Strasburq Universitetində "laparoskopik cərrahiyyə" üzrə diplom kursunda təhsil alıb. 2013–2015-ci illərdə Riqa Beynəlxalq İqtisadiyyat və Biznes Məktəbi ilə Riqa Stradiņš Universitetinin birgə magistr proqramını bitirərək 2015-ci ilin mayında səhiyyənin idarə edilməsi üzrə magistr dərəcəsi alıb.

Əmək fəaliyyətinə Bakıdakı 16 saylı poliklinikada uroloq kimi başlayıb. 1994–1997-ci illərdə rayon uroloqu, 1997–2001-ci illərdə "H.T.P.-hi tec Pharm Israel" klinikasının tibbi direktoru və uroloqu olub. 2001–2003-cü illərdə Reproduktiv Sağlamlıq Proqramının direktor müavini, 2003–2006-cı illərdə Bakı Şəhər Xəstəxanasında uroloq işləyib. 2006–2015-ci illərdə N. Tusi klinikasında uroloqdan baş həkimədək vəzifələrdə çalışıb. 2015–2016-cı illərdə Bakı "Dobromed" xəstəxanasının, 2016–2019-cu illərdə Qəbələdəki "Chenot Palace" sağlamlıq mərkəzinin tibbi direktoru olub. 2020–2021-ci illərdə Səhiyyə Nazirliyinin səhiyyənin təşkili şöbəsinin direktoru vəzifəsində işləyib.

2022-ci il yanvarın 19-da Azərbaycan Respublikası Prezidentinin Sərəncamı ilə Azərbaycan Respublikasının səhiyyə naziri təyin edilib. 2026-cı il oktyabrın 19-da səhiyyə naziri vəzifəsindən azad edilib və həmin gün Prezidentin Sərəncamı ilə Azərbaycan Respublikası Baş nazirinin müavini təyin edilib.