Zelenskiy Rusiyanın enerji obyektlərinə zərbələrin dayandırılması şərtini açıqladı

Ukrayna prezidenti Volodimir Zelenskiy Rusiyanın enerji obyektlərinə zərbələrin dayandırılması ilə bağlı Kiyevin şərtini açıqlayıb.

Zelenskiy “X” sosial şəbəkəsində yazıb ki, Rusiya Ukraynanın enerji sektorunu, kritik infrastrukturunu və ərzaq ixracını hədəfə almağı dayandırmalıdır. Onun sözlərinə görə, bu halda Ukrayna tərəfindən də qarşılıqlı deeskalasiya addımları atıla bilər.

Zərbələrin dayandırılması ilə bağlı təklif

“Ukraynanın enerji sektoru, kritik infrastrukturu və ərzaq ixracı Rusiya üçün hədəf olmaqdan çıxmalıdır. Bu, bizim tərəfdən də uyğun deeskalasiya addımlarına gətirib çıxaracaq”, – Zelenskiy bildirib.

Ukrayna lideri məsələni ABŞ və digər tərəfdaşlarla BMT Baş Assambleyasının Nyu-Yorkda keçirilən iclası çərçivəsində müzakirə etməyə hazır olduqlarını qeyd edib.

Zelenskiy Rusiya-Ukrayna müharibəsinin başa çatdırılmasının vacibliyini vurğulayıb. O, genişmiqyaslı işğalın ilk ilindən etibarən müharibənin insan tələfatı, şəhər və kəndlərin dağıdılması, ərzaq təhlükəsizliyi və enerji sahəsində ciddi nəticələrə səbəb olduğunu bildirib.