OMM Redaksiyası
ABŞ-ın Yeni Orlean şəhərində, Missisipi çayında yük tankeri sərnişin kruiz gəmisinə çırpılıb. Hadisə noyabrın 13-də, günorta saatlarında baş verib. Toqquşma zamanı gəmidəki bəzi insanlar suya düşüb, digərləri isə gəmini tərk etməyə çalışıb. AnewZ-in məlumatına görə, hadisədən sonra 32 nəfər xəstəxanaya yerləşdirilib, onların heç birinin vəziyyəti kritik deyil.
Yeni Orleanın meri Helena Moreno bildirib ki, toqquşmadan sonra göyərtədə olanların hamısı xilas edilib. O, baş verənlərin nəticəsini “Missisipi üzərində möcüzə” adlandırıb.
Moreno hadisə zamanı “Atlantic Asphalt” tankerinin idarəetmədən çıxaraq dayanmış kruiz gəmisinə çırpıldığını deyib. Sərnişinlər gəmini tərk etməyə başlayandan sonra gəmi suya batmağa başlayıb, daha sonra çevrilərək aşıb və insanları çaya atıb.
Liman polisi rəisi Melanie Montroll yerli medianın məlumatına əsasən, gəmi çevrilənədək təxminən 87 sərnişinin gəmidən düşdüyünü bildirib. Moreno isə gəmidə təxminən 180–190 sərnişin və heyət üzvünün olduğunu deyib. “American Cruise Lines” şirkətinin saytında gəminin 2015-ci ildə inşa edildiyi və 150 sərnişin daşımaq tutumuna malik olduğu göstərilir.
Toqquşmadan sonra ABŞ Sahil Mühafizəsi hadisə yerinin yaxınlığında çay nəqliyyatının hərəkətinin dayandırıldığını bildirib. Moreno yanğınsöndürənlərin və Sahil Mühafizəsinin çevik müdaxiləsinin, eləcə də digər gəmilərdə olan insanların köməyinin can itkisinə yol verilməməsində rol oynadığını deyib.
“American Cruise Lines” yazılı açıqlamasında Sahil Mühafizəsi və yerli qurumlarla koordinasiyalı işlədiyini bildirib. Şirkət “Sərnişinlər və heyət təxliyə edilib, hadisəyə cəlb olunan hər kəsin vəziyyətindən ciddi narahatıq” deyə qeyd edib.
