Afət Ziyadqızı
İranın müxtəlif bölgələrindən minlərlə insan cümə axşamı paytaxt Tehranda toplaşaraq İslam İnqilabının banisi Ayətullah Ruhullah Xomeyninin vəfatının 37-ci ildönümünü qeyd edib.
“Operativ Məlumat Mərkəzi-OMM” xəbər verir ki, bu barədə xarici KİV məlumat yayıb.
Məlumata görə, mərasim Tehranın cənubunda yerləşən İmam Xomeyni məqbərəsində keçirilib. Ölkənin müxtəlif şəhər və kəndlərindən gələn iştirakçılar arasında bəzilərinin paytaxta piyada gəldiyi bildirilib.
Tədbir çərçivəsində İranın Məhkəmə Sisteminin rəhbəri Qulam-Hüseyn Mohseni Ejei və Baş prokuror Məhəmməd Cəfər Montazeri də daxil olmaqla bir sıra yüksək vəzifəli rəsmilər də iştirak ediblər.
Mərasimdə həmçinin İslam İnqilabının hazırkı lideri Ayətullah Seyid Müctəba Xameneinin müraciətinin oxunacağı bildirilib.
Qeyd olunub ki, İmam Xomeyninin vəfatının ildönümü hər il geniş kütləni bir araya gətirərək ölkədə birliyə çağırış kimi qiymətləndirilir. Bu il isə müharibə şəraiti səbəbindən xarici səfirlərin və digər qonaqların tədbirdə iştirak etmədiyi bildirilib.
