Azərbaycan və Rusiya arasında münasibətlərin normallaşması prosesi, o cümlədən hər iki dövlət başçısının şəxsi təşəbbüsləri sayəsində uğurla keçib.
“Operativ Məlumat Mərkəzi-OMM” xəbər verir ki, bu barədə Azərbaycanın xarici işlər naziri Ceyhun Bayramov iyulun 17-si Moskvada rusiyalı həmkarı Sergey Lavrovla ikitərəfli danışıqların yekunlarına dair birgə mətbuat konfransında bildirib.
"Biz yaxın keçmişimizdə ikitərəfli münasibətlərdə çətinliklərlə üzləşmişdik və məmnuniyyət hissi ilə qeyd etmək istəyirik ki, bu səhifəni çevirə və onların bütün spektrini tamamilə normallaşdıra bildik. Bu, ölkələrimizin prezidentlərinin şəxsi mövqeyi sayəsində mümkün oldu. Proses iki dövlət başçısının Düşənbədəki beynəlxalq tədbir çərçivəsində ikitərəfli şəxsi görüşünün yekunlarına əsasən baş verib", - C. Bayramov deyib.
Onun sözlərinə görə, bütövlükdə, rusiyalı həmkarı ilə bugünkü danışıqlar "çox əhatəli, məhsuldar" olub:
"Biz bütün tədbirlər kompleksini nəzərdən keçirə bildik. Həmçinin ən yüksək səviyyədə müzakirə olunmuş artıq mövcud olan razılaşmaların icrasına diqqət yetirdik, eləcə də bir sıra yeni istiqamətlər üzrə qarşılıqlı fəaliyyət perspektivlərinə diqqət yetirdik. Ölkələrimiz arasında ticari-iqtisadi əməkdaşlıq məsələsinə ayrıca toxunuldu. Dünya iqtisadiyyatının üzləşdiyi çətinliklərə baxmayaraq, məmnuniyyətlə qeyd edirik ki, münasibətlərimizdəki bu istiqamət müsbət xarakter daşıyır".
