OMM Redaksiyası
Meksikalı hücumçu Raul Ximenes karyerasının növbəti mərhələsini İngiltərənin "Vulverhempton" klubunda keçirəcək.
"Operativ Məlumat Mərkəzi-OMM" xəbər verir ki, 35 yaşlı futbolçu "canavarlar" ilə rəsmi müqavilə imzalayıb.
Klubun mətbuat xidmətindən verilən məlumata görə, tərəflər arasında imzalanan müqavilə iki il müddətinə nəzərdə tutulub.
Razılaşmaya əsasən, müqavilənin müddəti daha bir mövsüm uzadıla bilər.
Qeyd edək ki, Ximenes üçün bu, "Vulverhempton"a ilk keçid deyil. O, 2018-2023-cü illər aralığında da bu komandanın şərəfini qoruyub.
Təcrübəli forvard sözügedən dövrdə meydana çıxdığı 166 qarşılaşmada 57 dəfə rəqib qapılarına yol tapmağı bacarıb.
Xatırladaq ki, ötən mövsüm İngiltərə Premyer Liqasında uğursuz çıxış edən "Vulverhempton" cəmi 20 xal toplayaraq turnir cədvəlini sonuncu pillədə başa vurub. Komanda yeni mövsümdə mübarizəni Çempionşipdə davam etdirəcək.
