Vaşinqton və Tehran arasında 11 aprel tarixində İslamabadda (Pakistan) planlaşdırılan danışıqların təşkilində ABŞ-ın vitse-prezidenti Cey Di Vens əsas rol oynayıb.
“Operativ Məlumat Mərkəzi-OMM” xəbər verir ki, bu barədə CNN mənbələrə istinadən məlumat yayıb. Mənbənin dəyərləndirməsinə görə, atəşkəs rejiminin möhkəmləndirilməsi üçün bir neçə günlük danışıqlar tələb olunacaq.
"Bununla yanaşı, Pakistan hakimiyyəti bu məqsədə nail olmağa kömək etmək üçün Cey Di Vensi ölkədə daha uzun müddət qalmağa razı salmağa ümid edir", - deyə məlumatda qeyd olunub. Bildirilir ki, İran tərəfi ABŞ Prezidentinin xüsusi elçisi, əvvəlki raundlara rəhbərlik etmiş və hazırkı qrupa daxil olan Stiv Uitkoffa etibar etmir. Artıq İran və Amerika nümayəndə heyətləri danışıqlar aparmaq üçün İslamabada gəliblər. Bununla belə, prosesin dəqiq başlama vaxtı hələlik açıqlanmır.
Xatırladaq ki, ABŞ və İsrail 28 fevralda İrana qarşı hərbi əməliyyatlara başlayıb və nəticədə İranın Ali rəhbəri Əli Xamenei daxil olmaqla bir sıra yüksək vəzifəli şəxslər öldürülüb. Buna cavab olaraq İran İsraillə yanaşı, ABŞ və müttəfiqlərinin hərbi bazalarının yerləşdiyi Səudiyyə Ərəbistanı, Qətər, Birləşmiş Ərəb Əmirlikləri, Oman, Bəhreyn, Küveyt, İraq və Kiprdəki hədəflərə zərbələr endirməyə başlayıb. Daha sonra, 8 apreldə İran ilə ABŞ və müttəfiqləri arasında ikihəftəlik atəşkəs barədə razılıq əldə olunub.
