ABŞ Hərbi Dəniz Qüvvələrinə məxsus “USS Abraham Lincoln” təyyarədaşıyan gəmisi Orta Şərqdəki uzunmüddətli missiyasını başa vuraraq San Dieqodakı ana bazasına qayıdır.
“Operativ Məlumat Mərkəzi – OMM” xəbər verir ki, gəmidə təxminən 5 min dənizçi və dəniz piyadası xidmət edir.
Əslində may ayında başa çatması planlaşdırılan missiya fevral ayının sonlarında İrana qarşı həyata keçirilən əməliyyatlar səbəbindən doqquz aya qədər uzadılıb. Gəmi heyəti dekabr ayından etibarən heç bir limana yan almadan 200 gündən çox müddəti açıq dənizdə keçirib. Ümumilikdə isə gəmi 250 gündən artıq fasiləsiz xidmət göstərib.
Hərbi qulluqçuların ailələri və yaxınları tərəfindən yayılan məlumatlarda gəmidəki şəraitlə bağlı ciddi narahatlıqlar ifadə olunub. İddialara görə, heyət üzvləri ərzaq təchizatında məhdudiyyətlər, isti suyun kəsilməsi və poçt göndərişlərində aylarla davam edən gecikmələrlə üzləşib. Bu vəziyyətin hərbçilər arasında mənəvi-psixoloji gərginliyə səbəb olduğu bildirilib.
ABŞ Mərkəzi Komandanlığının komandanı admiral Bred Kuper gəmini ziyarət edərək heyətə geri dönüş xəbərini çatdırıb. Həm Kuper, həm də ABŞ-ın müdafiə naziri Pit Heqset gəmidəki mənfi şəraitlə bağlı yayılan xəbərlərin şişirdildiyini vurğulayıb və zəruri tədbirlərin görüldüyünü bəyan ediblər.
“USS Abraham Lincoln”un bölgəni tərk etməsi ilə paralel olaraq, ABŞ Mərkəzi Komandanlığının məsuliyyət zonasındakı tapşırıqları yerinə yetirmək üçün “USS George Washington” təyyarədaşıyan gəmisi bölgəyə çatıb.
