ABŞ Prezidenti Donald Trampın administrasiyası miqrantların sığınacaq müraciətləri ilə bağlı yeni qaydalar hazırlayır. Xarici KİV-in məlumatına görə, bu dəyişikliklər miqrasiya xidmətlərinə bəzi müraciətləri ərizəçilərlə müsahibə keçirmədən rədd etmək imkanı yarada bilər.
Layihəyə əsasən, U.S. Citizenship and Immigration Services (USCIS) əməkdaşları ölkəyə girişdən bir ildən çox müddət keçdikdən sonra edilən və qanunla nəzərdə tutulan istisnaları təsdiqləyən sənədləri olmayan müraciətləri baxılmadan geri qaytara biləcəklər. Bu cür hallarda müraciət sahibləri deportasiya prosesi çərçivəsində immiqrasiya məhkəməsinə yönləndiriləcək.
Yeni tədbirlər Tramp administrasiyasının sığınacaq sisteminə çıxışı məhdudlaşdırmaq siyasətinin bir hissəsi kimi qiymətləndirilir. USCIS nümayəndələri hazırda baxılmamış 1 milyondan çox müraciətin sayını azaltmaq üçün müxtəlif variantlar üzərində işlədiklərini qeyd ediblər.
Öz növbəsində, hüquq müdafiəçiləri yeni qaydaların sığınacaq axtaran şəxslərin sənədlərin gecikmə səbəblərini izah etmək imkanlarını məhdudlaşdıracağından narahatlıqlarını ifadə ediblər.
