ABŞ Silahlı Qüvvələrinin Mərkəzi Komandanlığı (CENTCOM) İranı ballistik raket və pilotsuz uçuş aparatlarının (PUA) tətbiqi ilə həyata keçirilən gecə hücumları səbəbindən atəşkəs rejimini "kobud şəkildə pozmaqda" ittiham edib. "Operativ Məlumat Mərkəzi-OMM"-in "Sky News"a istinadən yaydığı məlumata görə, İran tərəfindən Küveyt istiqamətinə atılan ballistik raket Küveyt qüvvələri tərəfindən uğurla ələ keçirilib.
ABŞ komandanlığının bəyanatında bildirilir ki, bu pozuntu İran qüvvələrinin Hörmüz boğazı və ətrafında təhlükə yaradan beş kamikadze zərbə PUA-sı buraxmasından bir neçə saat sonra qeydə alınıb. CENTCOM bütün PUA-ların ABŞ qüvvələri tərəfindən zərərsizləşdirildiyini açıqlayıb.
Bundan əlavə, komandanlıq ABŞ hərbçilərinin Bəndər-Abbasdakı İran yerüstü idarəetmə məntəqəsindən daha bir PUA-nın buraxılmasının qarşısını aldığını qeyd edib. Bəyanatda ABŞ-ın öz qüvvələrini və maraqlarını "əsassız İran aqressiyasından" qorumaq üçün "diqqətli" fəaliyyətini davam etdirəcəyi vurğulanıb.
