Kolumbiyadakı digər hava yolu şirkətlərinə nisbətən daha sərfəli bilet satışı ilə tanınan "Ultra Air" sektorda mənfi makroiqtisadi şərtlərin olduğunu əsas gətirərək, daxili fəaliyyətini dayandırdığını açıqladı.
"Operativ Məlumat Mərkəzi-OMM" xarici mediaya istinadən xəbər verir ki, Artan xərclərə işarə edən şirkət açıqlamasında, "Yanacaq xərcləri və valyuta məzənnəsindəki artım kimi mənfi makroiqtisadi şərtlər hava yolu xərclərinin əhəmiyyətli dərəcədə artmasına səbəb oldu"- deyib.
Ölkədə bir ilə yaxındır fəaliyyət göstərən şirkətin bu müddət ərzində 2 milyondan çox sərnişin daşıdığı, 1200 işçisi olduğu və aviaşirkət bazarının 8 faizinə sahib olduğu paylaşılıb.
Bu qərarın Çilidə yerləşən ABŞ investisiya fondu Indigo Partners tərəfindən idarə olunan JetSmart-ın Ultra Air-in mümkün alışından imtina etməsindən sonra qəbul edildiyi güman edilir.
Ölkədə sonuncu dəfə martın 1-də hava yolu şirkəti Viva Air, yaşadıqları iqtisadi böhranı əsas gətirərək müxtəlif milli və beynəlxalq istiqamətlərdə fəaliyyətini dayandırdığını açıqlayıb.
