OMM Redaksiyası
Türkiyədə şənbə günü dərc olunan yeni qaydalara əsasən, 15 yaşına çatmamış uşaqlara sosial şəbəkələrdən istifadə qadağan edilir. Qaydalar şirkətlərin bu yaş həddinə çatmayan uşaqlara xidmət göstərməsini yasaqlayır.
Sosial şəbəkə şirkətləri 15–17 yaşlı yeniyetmələr üçün əlavə qorunma tədbirləri nəzərdə tutan ayrıca xidmətlər yaratmalıdır. Bu istifadəçilərin hesabları məxfi olmalı, izlədikləri və onları izləyən şəxslər başqalarına görünməməlidir.
Qaydalara görə, kontaktların sinxronlaşdırılmasına, videoların avtomatik başladılmasına və sonsuz sürüşdürmə funksiyasına icazə verilməyəcək. Ekran görüntülərinin çəkilməsi də bloklanmalıdır.
Yeni tənzimləmələr Türkiyə parlamentinin apreldə qəbul etdiyi qanundan sonra hazırlanıb. Sosial şəbəkə istifadəçiləri yaşlarını Türkiyə hökumətinin onlayn portalı vasitəsilə təsdiqləməli olacaqlar. Təsdiqlənməmiş mövcud hesabların qeydiyyatdan keçməsi üçün son tarix 2027-ci il martın 31-dir.
Türkiyənin Ailə və Sosial Xidmətlər naziri Mahinur Özdemir Göktaş qaydaların dərc olunmasını hökumətin uşaqların onlayn təhlükəsizliyini təmin etmək səylərində “yeni mərhələ” adlandırıb. O, şənbə günü “X” platformasında paylaşdığı açıqlamada platformaların zərərli məzmuna qarşı filtrlər və qoruyucu tövsiyə sistemləri tətbiq etməli olacağını, öhdəliklərin yerinə yetirilməməsinə görə cərimələrin nəzərdə tutulduğunu bildirib.
2025-ci ilin dekabrında Avstraliya 16 yaşdan kiçik uşaqlara sosial şəbəkələrdən istifadəni qadağan edən dünyada ilk ölkə olub. Bundan sonra Azərbaycan, Kanada, Qazaxıstan, Malayziya və Yeni Zelandiya da uşaqların sosial şəbəkələrə çıxışını məhdudlaşdırmaq üçün qanunvericilik tədbirləri tətbiq edib.
