Türkiyənin xarici işlər naziri Hakan Fidan sabah İndoneziyaya rəsmi səfərə yola düşür. Türkiyə Xarici İşlər Nazirliyindən verilən məlumata görə, səfər zamanı iki dövlət arasında mövcud siyasi, iqtisadi və strateji əlaqələrin daha da genişləndirilməsi istiqamətində müzakirələr aparılacaq.
Görüşlərdə liderlərin siyasi iradəsi əsasında əməkdaşlığın dərinləşdirilməsi üçün atılacaq addımlar nəzərdən keçiriləcək. Hakan Fidanın ikitərəfli ticarət dövriyyəsinin 10 milyard dollara çatdırılması hədəfi ilə bağlı aşağıdakı sahələrdə tərəfdaşlığın gücləndirilməsinin vacibliyini vurğulayacağı gözlənilir:
- İnfrastruktur və enerji
- Nəqliyyat və rəqəmsallaşma
- Süni intellekt və yüksək texnologiyalar
- Halal qida sektoru
Bundan əlavə, müdafiə sənayesi sahəsindəki layihələrin icrası və gələcək əməkdaşlıq perspektivləri də gündəmdə olacaq. Səfər çərçivəsində regional və beynəlxalq məsələlər, xüsusilə Qəzzadakı vəziyyət, Fələstində sülhün təmin edilməsi, habelə İsrailin regiondakı fəaliyyəti ətrafında fikir mübadiləsi aparılacaq.
Gündəlikdə yer alan digər mövzular sırasında İran və Hörmüz boğazı, Suriya, Rusiya-Ukrayna müharibəsi, Somali, Sudan, Liviya və Asiya-Sakit Okean regionundakı təhlükəsizlik məsələləri yer alır. Həmçinin, tərəflərin BMT, G20, İslam Əməkdaşlıq Təşkilatı, ASEAN, MIKTA və D-8 kimi beynəlxalq platformalarda birgə fəaliyyəti də müzakirə ediləcək.
