İstanbulda Türkiyənin xarici işlər naziri Hakan Fidan ilə Fələstinin HƏMAS hərəkatının yüksək səviyyəli nümayəndə heyəti arasında mühüm diplomatik məsləhətləşmələr keçirilib.
"Operativ Məlumat Mərkəzi-OMM" xəbər verir ki, görüşün əsas məqsədi Qəzzada əldə olunmuş kövrək atəşkəsi möhkəmləndirmək və bölgəyə həyati əhəmiyyətli humanitar yardımların çatdırılmasını sürətləndirməkdir.
Müzakirələr zamanı sülh sazişinin ikinci mərhələsinin icrası xüsusi diqqət mərkəzində olub.
Bu mərhələ Qəzza zolağının həm siyasi, həm də fiziki cəhətdən yenidən qurulması üçün həlledici məqam hesab olunur. Diplomatik mənbələrin verdiyi məlumata görə, Hakan Fidan HƏMAS rəhbərliyinə rəsmi Ankaranın müxtəlif beynəlxalq platformalarda apardığı intensiv diplomatik fəaliyyətlər barədə məlumat verib.
Görüşün ən mühüm mövzularından biri də "Sülh Şurası" ("Board of Peace") adlı yeni beynəlxalq qurumun fəaliyyət mexanizmi olub.
Qeyd edək ki, bu şura 15 yanvar tarixində ABŞ prezidenti Donald Tramp tərəfindən təsis edilib və BMT Təhlükəsizlik Şurasının 2025-ci ilin noyabrında qəbul etdiyi 2803 saylı qətnaməsi ilə beynəlxalq legitimlik qazanıb. Türkiyə bu mexanizmin Qəzza xalqının fundamental hüquqlarını qorumaq üçün mühüm vasitə olduğunu vurğulayır.
Türkiyə tərəfi "Sülh Şurası"nın yalnız təhlükəsizlik nəzarətçisi kimi deyil, həm də Fələstinin öz müqəddəratını təyin etməsi üçün vasitəçi kimi çıxış etməsinin vacibliyini bildirib. Hakan Fidan qeyd edib ki, fələstinlilərin perspektivlərinin beynəlxalq gündəmdə qalması üçün konstruktiv dialoq mütləqdir.
