OMM Redaksiyası
“Turan Tovuz” futbol klubunda baş məşqçi dəyişikliyi baş verə bilər. Football.az-ın məlumatına görə, bölgə təmsilçisi Kurban Berdıyevlə yolları ayırmağı ciddi şəkildə nəzərdən keçirir.
Bu ehtimalın səbəbi komandanın təcrübəli mütəxəssisin rəhbərliyi altında gözlənilən oyunu nümayiş etdirməməsidir. Klub rəhbərliyi Berdıyevin qarşısına maksimum hədəflər qoyub və onun istədiyi transferləri həyata keçirib.
Buna baxmayaraq, rəhbərliyin komandanın yüksək yerlər uğrunda mübarizə aparacağına inamının olmadığı bildirilir. Tovuz təmsilçisi 74 yaşlı mütəxəssisi adı hələ açıqlanmayan türkiyəli baş məşqçi ilə əvəzləmək barədə düşünür.
“Turan Tovuz” Misli Premyer Liqasında altı turdan sonra 11 xalla dördüncü pillədə qərarlaşıb. Komanda keçirdiyi altı matçda cəmi altı qol vurub. Berdıyevlə bağlı mümkün qərar və onun əvəzinə nəzərdən keçirilən türkiyəli mütəxəssisin kimliyi barədə əlavə məlumat verilməyib.
