Tümen vilayətinin 47 yaşayış məntəqəsində 380-dən çox yaşayış binası, həmçinin 523 bağ evi, 3225 şəxsi torpaq sahəsi və 34 yol sahəsi su altında qalıb.

"Operativ Məlumat Mərkəzi-OMM" xəbər verir ki, bu barədə Rusiya Fövqəladə Hallar Nazirliyi məlumat yayıb.

“47 yaşayış məntəqəsində 384 yaşayış binası, 523 bağ evi, 3225 təsərrüfat sahəsi, 34 avtomobil yolları su altında qalıb”, - deyə məlumatda bildirilir.

Nazirlik qeyd edib ki, Vikulovski rayonunda İşim çayında suyun səviyyəsi qalxmaqda davam edir.

Daşqın proqnozu ilə əlaqədar Tümen vilayətində əvvəlcədən fövqəladə vəziyyət elan edilib. İşim və Tobol çaylarında suyun səviyyəsinin yüksək olacağı gözlənilir. Bölgə qubernatoru bəndlərin uçması və ya daşması ehtimalının artdığını deyib.

Rusiyanın Sankt-Peterburq şəhərində S.M.Budyonnı adına Hərbi Rabitə Akademiyasının təsərrüfat ərazisində partlayış baş verib, yeddi hərbçi yaralanıb.

"Operativ Məlumat Mərkəzi-OMM" xəbər verir ki, bu barədə Leninqrad Hərbi Dairəsinin mətbuat xidmətindən bildirilib.

Qeyd edilir ki, hadisə akademiyanın zirzəmilərdən birinin təmizlənməsi zamanı partlayış baş verib. Partlayış nəticəsində yeddi hərbçi yaralanıb. Zərərçəkənlərin hamısı Rusiya Müdafiə Nazirliyinin Tibb Müəssisəsinə aparılıb və onlara tibbi yardım göstərilir.

Qara dəniz taxıl təşəbbüsü həyata keçirilməsəydi, Afrikanın bir çox ölkəsində qıtlıq baş verərdi.

"Operativ Məlumat Mərkəzi-OMM" xəbər verir ki, bu barədə Türkiyə Prezidenti Rəcəb Tayyib Ərdoğan bildirib.

Onun sözlərinə görə, 21-ci əsrdə ölkələr arasında əsas mübarizə kənd təsərrüfatı torpaqları, su və ərzaq uğrunda olacaq və bu prosesin əlamətləri artıq görünür.

“İnkişaf etmiş ölkələr Afrikada kənd təsərrüfatı torpaqlarını icarəyə götürmək üçün böyük yarışa başlayıblar, iqlim dəyişikliyinin mənfi təsirlərinə görə su ehtiyatları və su hövzələri münaqişə xəttinə çevrilir. Pandemiya və Rusiya-Ukrayna müharibəsi zamanı bütün ölkələrin ərzaq təhlükəsizliyini təmin etmək üçün necə şiddətlə mübarizə apardığını unutmamışıq. Türkiyənin səyləri ilə həyata keçirilən Qara dəniz taxıl təşəbbüsü olmasaydı, başda Afrika ölkələri olmaqla bir çox bölgədə qıtlıq yaşanacaqdı”, - o deyib.

Ərdoğan qeyd edib ki, Türkiyə vəziyyətin nəzarətdən çıxmasının qarşısını alıb və ümumilikdə 33 milyon ton taxılın dəniz boğazlarından təhlükəsiz keçməsini təmin edib. O, həmçinin vurğulayıb ki, kənd təsərrüfatı istehsalı və təchizatı dövlətlərin təhlükəsizliyinin təmin edilməsi baxımından strateji sahələr olaraq qalacaq və Türkiyə buna hazır olmalıdır.

Ermənistanın təhsil, elm, mədəniyyət və idman naziri Janna Andreasyan və Türkiyənin mədəniyyət və turizm naziri Mehmet Nuri Ersoy tarixi Ani körpüsünün bərpası məsələsi ətrafında fikir mübadiləsi aparıblar.

"Operativ Məlumat Mərkəzi-OMM" “News.am”a istinadən xəbər verir ki, görüş mayın 17-də Aşqabadda keçirilən Mədəniyyət Nazirlərinin Beynəlxalq Konfransı çərçivəsində baş tutub.

Onlar, həmçinin Ermənistan və Türkiyə arasında münasibətlərin tam nizamlanması çərçivəsində mədəniyyət sahəsində əməkdaşlığın qurulmasını da müzakirə ediblər.

Türkiyə ilk dəfə NATO ölkəsi olan Polşaya "Bayraktar-TB2" pilotsuz uçuş aparatları (PUA) satıb.

"Operativ Məlumat Mərkəzi-OMM" “Milliyət”ə istinadən xəbər verir ki, Türkiyənin 24 ədəd sözügedən texnikası artıq Polşa Müdafiə Nazirliyinə təslim edilib.

Türkiyə Müdafiə Sənayesi İdarəsinin rəhbəri Haluk Gürgön bildirib ki, Ankara sözügedən sahədə artıq qlobal oyunçudur.

“Dost və qardaş ölkələrin ehtiyaclarını təmin edirik. PUA texnologiyasında dünyanın öndə olan üç ölkəsindən biriyik. "Baykar" bütün dünyanın diqqətində olan şirkətdir. Şirkətimizin bu uğuru ölkəmizin dünyadakı imicinə də müsbət təsir göstərir”, - o qeyd edib.

Ermənistanın baş naziri Nikol Paşinyan və hakim “Vətəndaş müqaviləsi” partiyası onun istefası ilə bağlı məsələni heç kimlə müzakirə etmək niyyətində deyil, heç kim hökumətin legitimliyini şübhə altına ala bilməz.

"Operativ Məlumat Mərkəzi-OMM" Ermənistan KİV-ə istinadən xəbər verir ki, bunu mayın 17-də jurnalistlərə Ermənistan parlamentinin xarici əlaqələr üzrə daimi komissiyasının sədri, hakim partiyadan olan deputat Sarkis Xandanyan bildirib.

O bildirib ki, bu məsələ müzakirə mövzusu ola bilməz, çünki Ermənistan vətəndaşları 2021-ci ildə seçki yolu ilə hökuməti təyin edən parlament formalaşdırıblar. Ermənistanda hakimiyyət yalnız demokratik, legitim yolla, 2026-cı ildə keçiriləcək seçkilər yolu ilə dəyişə bilər.

S.Xandanyan onu da qeyd edib ki, baş nazirlə “Vətən uğrunda Tavuş” hərəkatının lideri, arxiyepiskop Baqrat Qalstanyan arasında görüş nəzərdə tutulmayıb: “Hansı məsələ ətrafında görüş keçirilməlidir? Hakim partiya belə bir təklif almayıb”.